میرے ربّ کی یہ خاص رَحمت ہے، مصطَفٰے کی بڑی عنایت ہے

میرے ربّ کی یہ خاص رَحمت ہے، مصطَفٰے کی بڑی عنایت ہے

غوث و احمد رضا کی برکت ہے، مجھ کو رَمضان سے محبت ہے

---

ماہِ رمضاں سے جس کو اُلفت ہے، قابلِ رشک اُس کی قسمت ہے

بے شک اُس پر خدا کی رحمت ہے، قبر و محشر میں وہ سلامت ہے

---

ماہِ رمضاں جہاں میں پھر آیا، مغفرت کا پیام ہے لایا

رحمت حق کا ہوگیا سایہ، لحظہ لحظہ نزولِ رحمت ہے

---

خوب رونق ہے ماہِ غفراں کی، کیسی برکت ہے ماہِ قراٰں کی

واہ کیا بات ماہِ رمضاں کی، کیا ہی رمضاں کی شان و شوکت ہے

---

پہلا عشرہ ہے خاص رحمت کا، دوسرا مغفرت کا ہے عشرہ

تیسرے میں ملے گی آزادی، نار سے اُس کو جس پہ رَحمت ہے

---

مسجدیں ہوگئی ہیں پھر آباد، بڑھ گئی نیکیوں کی ہے تعداد

سرد بدیوں کا ہوگیا بازار، بڑھ گیا جذبۂ عبادت ہے

---

واہ سحری کی کیا بہاریں ہیں، خوب افطار کے نظارے ہیں

روزہ داروں کے وارے نیارے ہیں، کیا تراویح کی بھی لذت ہے

---

ماہِ رمضاں کا غم عطا فرما، یاخدا! چشم نم عطا فرما

ماہِ رمضاں کے عشق میں رونا دو جہاں کیلئے سعادت ہے

---

ماہِ رمضاں کے روزہ داروں کی، خوش نصیبی ہے اور خوش بختی

اُس کو فیضانِ ماہِ رمضاں سے خلد ملتی ہے ملتی جنت ہے

---

مالکِ دو جہاں! پئے جاناں، تو بنا اس کو عاشق رمضاں

ماہِ رمضاں کے عشق میں تڑپے، عرضِ عطارـؔ ربِّ عزت ہے