واقف راہِ شریعت ہوں وہ فرزانہ ہوں

واقف راہِ شریعت ہوں وہ فرزانہ ہوں

محرمِ رازِ حقیقت ہوں وہ دیوانہ ہوں

---

کعبہء اہلِ طریقت ہوں وہ کاشانہ ہوں

مستیاں کرتا ہوں تقسیم وہ میخانہ ہوں

---

جس سے پیمانے کریں ہیار وہ میخوار ہوں میں

جس سے میخوار لپٹ جائیں وہ پیمانہ ہوں

---

عشق و مستی کے چمن میں ہوں بہاروں کی طرح

علم و حکمت کا چھلکتا ہوا پیمانہ ہوں

---

اہلِ ایماں کی نگاہوں میں ہدایت کا چراغ

بت پرستوں کے لیے زینتِ بت خانہ ہوں

---

کبھی مسجودِ ملائک ہوں کبھی سر بسجود

ہوں کبھی شمع کبھی صورتِ پروانہ ہوں

---

کبھی مندر کبھی مسجد ہے ٹھکانہ میرا

کبھی کافر ہوں کبھی مومنِ فرزانہ ہوں

---

پوجتے ہیں مجھے اربابِ بصیرت واللہ

وہ رخِ یار ہوں وہ جلوہء جانانہ ہوں

---

کسی صورت سے بھی ملتی نہیں صورت میری

سب میں بے مثل ہوں یکتا ہوں جداگانہ ہوں

---

میں وہ پردہ ہوں کہ اٹھ جائے تو کچھ بھی نہ رہے

دونوں عالم کا بھرم ہوں وہ پری خانہ ہوں

---

موت کیا مجھ کو مٹائے گی جہاں سے اعظم

ذرے ذرے کی زباں پر ہوں وہ افسانہ ہوں