دل میں اُترتے حرف سے ‘ مجھ کو ملا پتا ترا
معجزہ حسنِ صوت کا ‘زمزمہء صدا ترا
میرا کمالِ فن ‘ترے حسنِ کلام کا غلام
بات تھی جاں فزا تری ‘لہجہ تھا دِ ل رُبا ترا
جاں تری ‘ سر بسر جمال ! دل ترا‘ آئینہ مثال!
تجھ کو ‘ ترے عدو نے بھی دیکھا ‘ تو ہوگیا ترا
اے مرے شاہِ شرق و غرب ! نان جویں غذا تری
اے مرے بوریا نشیں ! سارا جہاں گدا ترا
سنگ زنوں میں گھر کے بھی ‘ تو نے انہیں دعا ہی دی
دشتِ بلا سے بارہا ‘ گزرا ہے قافلہ ترا
کوئی نہیں تری نظیر روزِ ازل سے آج تک
تا بہ ابد نہیں مثیل ‘ کوئی ترے سوا ‘ ترا
یوں تو ‘ تری رسائیاں ‘ فرش سے عرش تک محیط
میں نے تو اپنے دل میں بھی ‘ پایا ہے نقشِ پا ترا
میرا تو کائنا ت میں ‘ تیرے سوا کوئی نہیں
ارض تری ‘ سما ترے بندے ترے ‘ خدا ترا
آتے ہوئے دنوں سے بھی ‘ مجھ کو کوئی خطر نہیں
ماضی و حال میں بھی جب پورا ہوا کہا ترا
دُور سہی دَیارِ نُور چُور سہی مرا شعور
تو مرا حوصلہ تو دیکھ ! میں بھی ہوں مبتلا ترا
شاعر کا نام :- احمد ندیم قاسمی
کتاب کا نام :- انوارِ جمال