الٰہی شاد ہوں میں تیرے آگے ہاتھ پھیلاکر

الٰہی شاد ہوں میں تیرے آگے ہاتھ پھیلاکر

مری اس کیفیت کو اپنی رحمت سے پذیرا کر

---

بھٹکتی آنکھ کو مرکوز فرما صبغتہ اللہ پر

دلِ بے تاب کو خوشبوئے یٰسیں سے شکیبا کر

---

مری بھیگی ہوئی پلکیں مخاطب ہیں تو بس تجھ سے

مری تقدیر کے تاریک غاروں میں اجالا کر

---

مرے چاروں طرف ہے، رقصِ وحشت روک دے اس کو

مرے اندر جو دشمن بڑھ رہا ہے اُس کو پسپا کر

---

رسُولِؐ پاک کے رستے سے ہٹ کر خوار ہے امّت

امین اس کو فلاح وخیر کا پھر سے خدایا کر

---

فروغ اقدارِ پیغمبرؐ کا ہو پھر سے زمانے میں

پریشاں آدمیّت پر کرم کا باب پھروَاکر

---

دُعائے سیّدؐ سادات سینے میں فروزاں ہے

حسیں کر دے مری دنیا، حسیں تر میری عقبہ کر

---

ترے محبوبؐ کی توصیف میں لب کھولتا ہوں مَیں

بہاراں آشنا یارب مری سوچوں کا صحرا کر

---

زوال آمادہ ہیں ہرچند اعصاب و قویٰ پھر بھی

جواں رکھ میرے جذبوں کو مرے لفظوں کو اجلا کر