اس خوش نصیب شخص کو رب کا سلام ہے

اس خوش نصیب شخص کو رب کا سلام ہے

مقصود جس کا مدحتِ خیرالانام ہے

---

کیسے خیالِ حسنِ نبی میں نہ وہ رہے

حسّان جس کے فکر و نظر کا امام ہے

---

جنت بھی چشمِ زائرِ طیبہ کو دیکھ کر

بولی تمہارے ذوقِ نظر کو سلام ہے

---

کیوں نا حصارِ مدحِ پیمبر میں ہی رہیں

دنیا میں مختصر سا ہمارا قیام ہے

---

معشوق ہوں جو ماہِ عرب کی ادائیں ، پھر

عاشق کی تشنگی کو بھلا کب دوام ہے

---

اُن کے حضور دل کا دھڑکنا بھی شور ہے

اہلِ ادب سے پوچھو تو یہ بھی حرام ہے

---

یہ سوچ کر بڑھیں کہ یہ ہے مسکنِ حضور

تاریکیوں کو دل سے اگر کوئی کام ہے

---

اُس خاندان پر نہ زباں کھولنا کبھی

ہر طفل پیدا ہوتے ہی جس کا امام ہے

---

خوشبو طوافِ قلبِ تبسم نہ کیوں کرے

مدحِ نبی کی سمت یہ محوِ خرام ہے