یا الہٰی تُو کارسازو کریم !
ما ورائے حدوث نُورِ قدیم
بے نیازی تجھی کو زیبا ہَے
اوّل و آخر و خبیر و علیم
عالمِ شش جہت خفی و جلی !
سب کا خالق ہَے تُو محیط و مقیم
ہیں وجود و عدم ترِی تخلیق
دم بدم ہر جگہ عیان و عدیم
تیرے جلوے عیاں ہوئے ہر جا
رنگِ گُل ، شبنم و نسیم و شمیم
بے نیازِ وجود نُور تِرا !
آئینہ دیکھنے کو قلبِ سلیم
عرشی و فرشی ‘ نُوری و ناری
جِنّ و انساں کریں تری تعظیم
گنجِ مخفی بھی آشکار بھی تُو
ہو ازل یا ابد تری اقلیم!
کب رقم ہوسکے ثنا تیری !
راقم اشجار ہوں بحور رقیم !
کوئی ہمسر نہ ہے شریک تیرا !
جو کرے دعوی ٰ و لعین و رحیم
تُو نے بخشا ہَے سب کو ذوقِ نمود
یہ کواکب، قمر ، یہ شمس عظِیم
موجِ قلزم تری جبال ترے
ہفت افلاک و ارض کا ہَے نعیم
اپنے اپنے مَدار میں گرداں
یہ نجومِ فلک ، جمیل و جیم
قلبِ مضطر کا تُو قرار و سکوں
تُو ہَے ستّار تو غفور و رحیم
تُو عیاں میں نہاں ، نہاں میں عیاں
صُورت و معنی ہیں کلام و کلیم
تُو ہی قہّار و قادر و جبّار!
منتقم تُو ہے ، تُو مذلِّ عظیم
تیری ہیبت سے کانپتا ہے جہاں
لقمہء نارِ مو قدہ ہو غنیم
کافر و مشرک وہنود و یہود !
زندہ ہیں اس لیے کہ تُو ہے کریم
جی رہے ہیں ترے سہارے پر
مورِ بے مایہ ہو کہ فیلِ شحیم
تُو ہَے رازق محافظ و مولا !
آدمی ہے مگر ظلوم و خصیم
عقل حیراں ہے فلسفہ" گُم صُم "
تجھ کو سمجھے کوئی کہاں کا فہیم
تیری تسبیح ، کائات کی خُو !
ذرّہ ذرّہ کہے عزیز و حکیم
تیرا احسان ہے بہ شکلِ نبیؐ
ذاتِ اقدس تری رؤف و رحیم
اپنے محبُوبؐ کی محبّت بخش
اے شہِ انس و جاں حکیم و حلیم
معصیت معرفت میں ہو تبدیل
دِل سے ہوں دُور خواہشاتِ ذمیم
خاک ہو جائے ما سِوا کی طلب
صرف تیری لگن ہو عزم صمیم
مومنوں کو ملے فغانِ سحر!
چاہنے والوں کو عطا ہو گلیم !
تیرے بندے نہ ہوں نحیف و غریب
تیرے باغی نہ ہوں امیر و لحیم !
راہ بر کون ، کون ہے رہزن ؟
دُودھ پانی کی ہو ذرا تقسیم
اپنے اسلام کی حفاظت کر !
لوگ کرنے چلیں ہیں کچھ تر میم
تُجھ کو اپنے حبیبؐ کی ہے قسم !
ہو عطا اُلفتِ نبیِؐ کریم !
ہم بھی دیکھیں ذرا وہی جلوے
سامنے ہوں نظر کے طور و کلیم ؑ
مظہرِ عینِ حق ہے ذاتِ نبی ؐ !
مرکزو محور و محبّ و مقیم
مسندِ عرش پر میان ِ کمان
حُسنِ احمدؐ ہے احسنِ تقویم
شانِ مولا ہو کیا بیاں واصؔف
اُس کا اِحسان ہے عظیم و قدیم
شاعر کا نام :- واصف علی واصف
کتاب کا نام :- شبِ چراغ