نہیں زبان میں طاقت خدیجتہ الکبری
بیاں کرے تِری عظمت خدیجتہ الکبری
لُٹا کے مالِ تجارت خدیجتہ الکبری
کی تم نے دین کی خدمت خدیجتہ الکبری
حریمِ نازِ رسالت کی زینتِ اول
تمہاری ذات ہے حضرت خدیجتہ الکبری
مِرے رسول پہ ایمان پہلے لائی ہیں
بلند آپ کی قسمت خدیجتہ الکبری
تمہارے واسطے رب سے سلام آیا ہے
کہ تم نبی کی ہو راحت خدیجتہ الکبری
تِری نگاہ میں روشن ہے روزِ روشن سی
نبی کی خلوت و جلوت خدیجتہ الکبری
ترانصیب تو وہ ہے مِرےحضور کے ساتھ
رہی طویل رفاقت خدیجتہ الکبری
قبول بارگہِ مصطفےٰ میں ہو جائے
لکھے شفیقؔ جو مدحت خدیجتہ الکبری
شاعر کا نام :- شفیق ؔ رائے پوری
کتاب کا نام :- متاعِ نعت