نذرِ محبوبِ خدا جانِ ابُو طالب ہے
ساری دُنیا پہ یہ احسانِ ابُو طالب ہے
اللہ اللہ ! عجب شانِ ابُو طالب ہے
حرمِ کعبہ، ادب دانِ ابُو طالب ہے
مُصحفِ رُوئے محمدؐ ہے نظر میں ہر دَم
مرحبا، خوب یہ قرآنِ ابُو طالب ہے
اِن کے آغوش کی زینت ہیں علی شیرِ خدا
نُورِ احمد، تہِ دامانِ ابُو طالب ہے
احترام اِن کا فرشتوں کی صفوں میں بھی ہُوا
جس کو دیکھو، وہ ثنا خوانِ ابُو طالب ہے
مُرتضیٰ ہوں کہ ہوں سبطین ، سبھی پیارے ہیں
ہر کِرن ، شمعِ شبستانِ ابُو طالب ہے
اُلفتِ پنج تنِ پاک نے بخشا یہ شرف
آج کل دل مِرا مہمانِ ابُو طالب ہے
چشمِ بیدار مِلی ، معرفت آگاہ نظر
درسِ حق ، خُطبہء عرفانِ ابُو طالب ہے
مَیں دل و جاں سے ہُوں مدّاح ، ابُو طالب کا
جو نَفَس ہے ، وہی قُربانِ ابُو طالب ہے
ہر گُلِ تر پہ نچھاور ہیں فلک کے تارے
پُر بہار ایسا ، گُلستانِ ابُو طالب ہے
قابلِ رشک ہیں انداز ابُو طالب کے
حق کا عرفان ہی وجدانِ ابُو طالب ہے
مَیں کہوں گا کہ ہے محروم بڑی نعمت سے
جو کوئی دستِ کشِ خوانِ ابُو طالب ہے
بعد تحقیقِ احادیث و روایات، نصیؔر !
میرا دل قائلِ ایمانِ ابُو طالب ہے
شاعر کا نام :- سید نصیرالدیں نصیر
کتاب کا نام :- فیضِ نسبت