مرکزِ عِلم ہوں کیو نکر نہ جنابِ صِدّیق
ایک اِک لفظ محمّد ؐ کا نِصابِ صدّیق
جنبشِ چشمِ رسالت فرسِ عبداللہ
نقشِ پائے شہِ کونَین ، رکابِ صدّیق
جِس کی ہر سانس مشقّت کا اچھوتا شہکار
اُس کے ماتھے کا پسینہ ہے شرابِ صِدّیق
جس کے لہجے میں سُنی ہم نے خُدا کی آواز
اُس نے بُوبکر کو بخشا ہے خطابِ صدّیق
غوطہ زن ، جس کے کناروں سے صَدف چُنتے ہیں
وہ صداقت کا سمندر ہے سرابِ صِدّیق
تان دیں چادرِ انوار، برستی بُونّدیں
آفتابوں کو بھی شرمائے سحابِ صِدّیق
بے زباں ہوگئی تارِیخ قیامت تک کی
نہ جوابِ شہ ِ بطحا نہ جوابِ صِدّیق
ابنِ عثمان کا سایہ ، مِرے اندر کی قبا
کار فرما مِری بینائی میں خواب ِ صِدّیق
ناز ہے مُجھ کو مظفّر کہ مَیں صِدّیقی ہوں
میرے ماضی کی طرف کھُلتا ہے بابِ صِدّیق
شاعر کا نام :- مظفر وارثی
کتاب کا نام :- بابِ حرم