ایک ایک قولِ پاکِ شہِ دوسرا ہے سچ

ایک ایک قولِ پاکِ شہِ دوسرا ہے سچ

جیسے کہ لفظ لفظ کلامِ خدا ہے سچ

---

دعوت پہ مصطفیٰؐ کی وہی ہو گئے عدو

کہتے تھے جو امین ہے یہ بولتا ہے سچ

---

جھوٹے خدائے کفر ہیں لات و ہبل منات

درسِ نبیؐ کے صدقے یہ سب پر کھلا ہے سچ

---

بو جہل نے غرور سے انکارِ حق کیا

حالاں کہ اس کو خوب پتہ تھا کہ کیا ہے سچ

---

شاہد ہیں سارے کفر و صداقت کے معرکے

باطل کے سامنے نہ کہیں بھی جھکا ہے سچ

---

ایمان کی صفت ہے یہ مومن کی شان ہے

ہر اہلِ حق کے قلب و جگر میں بسا ہے سچ

---

معراج کا عتیق نے جب واقعہ سنا

فورًا پکار اُٹھے نبیؐ نے کہا ہے سچ

---

بو لے عمر حضورؐ سے کلمہ پڑھائیے

قرآن سن کے مجھ کو نظر آگیا ہے سچ

---

بے شک وہی رسولؐ کا سچا غلام ہے

ہیں جس کے سچے قول و عمل بولتا ہے سچ

---

احسنؔ کی نعت میں نہیں کوئی مبالغہ

جو بھی لکھا ہے مدحِ نبیؐ میں لکھا ہے سچ