ایک ذرّے کو بھی خورشید بناتے دیکھا

ایک ذرّے کو بھی خورشید بناتے دیکھا

اُن کو ہر حال میں تقدیر جگاتے دیکھا

---

واقعی اب بھی دلوں پر ہے حکومت اُن کی

سرکشوں کو سرِ تسلیم جُھکاتے دیکھا

---

آنکھیں پڑھتی ہیں اگر دیکھ کے روضے کو دُرود

آنسؤوں کو بھی وہاں نعت سُناتے دیکھا

---

درودیوار ہیں روشن کہیں آنسو روشن

جشن مِیلاد ہر اک شے کو مَناتے دیکھا

---

آپ کی قوّت ِ بازو پہ تصدّق دل و جاں

بار اْمّت کے گناہوں کا اُٹھاتے دیکھا

---

آپؐ کے آنے کا ایقان اِسے کہتے ہیں

ہم نے عشّاق کو گھر بار سَجاتے دیکھا

---

دل کہاں اَور کہاں آپ کے جلوے آقاؐ

ہم نے کوزے میں بھی دریا کو سَماتے دیکھا

---

جن کو دنیا میں کوئی پوچھنے والا ہی نہ تھا

اُن کو بھی دامنِ رحمت میں چھُپاتے دیکھا

---

اُس نے محسوس کیا عشق کِسے کہتے ہیں

جس نے خالدؔ کو کبھی نعت سناتے دیکھا