غماں دے ماریاں دا ہے سہارا
مدینے والیا تیرا دوارا
غریباں ول کرم دی جھات پاجا
خدا دی سلطنت دیا تاجدارا
تیرا وسدا روئے سوہنا مدینہ
میری قسمت دا وی چمکے ستارا
غماں دے شوہ دے وچہ ڈبدی ہے جاندی
میری کشتی نوں مل جاوے کنارا
پھڑن مینوں جدوں ربدے سپاہی
کریں اُس ویلے اُنگلی دا اشارا
توں اپنی آل دے صدقے کرم کر
کدوں تک میں پھراں گا مارا مارا
نیازی نوں بلا کے کول اپنے
کرا دے سبز گنبد دا نظارا
شاعر کا نام :- عبدالستار نیازی
کتاب کا نام :- کلیات نیازی