حبیبِ کبریا سرکارِ بطحا
جمالِ حق نما سرکار بطحا
محبِ دوسرا سر کارِ بطحا
ہما را آسرا سرکارِ بطحا
انہی کے دم سے ہے ایماں ہمارا
ہیں دیں کے ناخُدا سرکارِ بطحا
ہے دل میں یاد تو یاد مُحمَّد
ہیں دل سے کب جُدا سرکارِ بطحا
چلو ان سے کہیں دل کی تمنّا
کہ ہیں شاہِ ہُدا سرکارِ بطحا
ہیں انکے نور سے روشن فضائیں
دو عالم کی ضیا سرکارِ بطحا
نہ ہو بہزؔاد کیوں بطحا منّور
کہ ہیں شمس الضحےٰ سرکارِ بطحا
شاعر کا نام :- بہزاد لکھنوی
کتاب کا نام :- نعت حضور