ہر اک منظر ہے دل آویز خوشبو ہے ہواؤں میں

ہر اک منظر ہے دل آویز خوشبو ہے ہواؤں میں

بہاریں رقص کرتی ہیں مدینے کی فضاؤں میں

---

وفاؤں کا تقاضا ہے دیارِ رنگ و نکہت میں

چلو اتنا کہ چل کر آبلے پڑ جائیں پاؤں میں

---

عجب دہلیز ہے، دہلیز سرکارِ دو عالم کی

وہاں ملتے ہیں تخت و تاج والے بھی گداؤں میں

---

انہیں دیکھو تو آنکھیں یہ کہیں بس دیکھتے جاؤ

عجب ہے حسن اس در کے غلاموں کی اداؤں میں

---

چلا ہے جو حبیبِؐ کبریا کی راہ پر اختؔر

مکمل ہے وہ اپنے شوق میں اپنی وفاؤں میں