جھکا کے اُنؐ کی عقیدت میں سر مدینے چلو

جھکا کے اُنؐ کی عقیدت میں سر مدینے چلو

برہنہ پا چلو با چشمِ تر مدینے چلو

---

وہؐ جانتے ہیں ہر اک دُکھ مٹا بھی سکتے ہیں

وہیں مقیم ہیں وہؐ چارہ گر مدینے چلو

---

صدائے صَلِ عَلٰے ہو تمہارا زادِ سفر

ردائے صَلِ عَلٰے اوڑھ کر مدینے چلو

---

ہوائیں چومنے آئیں گی دست و نقشِ قدم

فرشتے ہونگے سدا ہمسفر مدینے چلو

---

نہیں ہے اور کوئی غمگسار اُنؐ کے سوا

سُنانے قصہء زخمِ جگر مدینے چلو

---

سلام کرنے کو شاہِ اُمَمؐ کے روضے پر

فرشتے آتے ہیں شام و سحر مدینے چلو

---

جو دیکھ آئے ہیں اک بار گنبدِ خضریٰ

وہ کہہ رہے ہیں کہ بارِدگر مدینے چلو

---

بھٹک رہے ہو کہاں دُور اپنے محور سے

وہی ہے اپنا وطن اپنا گھر، مدینے چلو

---

کبھی تو آئے گی اشفاقؔ یہ ندا مجھ کو

بُلا رہے ہیں تجھے تاجورؐ مدینے چلو