کرماں والا بھاگاں والا تیرا سخی دربار نبیاں دے سردار
سوہناں روضہ نور اجالے ویکھن جا کے کرماں والے
ہتھ بنھ عرضاں کر دے در تے عاصی اوگنہار نبیاں دے سردار
میں وی تیرے در تے آواں اکھیاں دی میں پیاس بجھاواں
سر تے ہون کرم دیاں چھاواں من ٹھارا من ٹھار نبیاں دے سردار
مست نظارے مست ہواواں مہکیاں مہکیاں رہن فضاواں
بھجیاں اکھیاں کرن دعاواں نظر کرو سرکار نبیاں دے سردار
شہنشاہاں دے پلے بھر دے منگتے وی نیں موجاں کر دے
کرم کریندے او ہر ہر تے سوہنے سید سردار نبیاں دے سردار
میرا کوئی وس نہ چلے کیویں آواں زر نئیں پلے
نظر کرو جے میرے ولے آ دیکھاں دربار نبیاں دے سردار
سوہنے سخی سید سلطاناں سب توں اچیاں تیریاں شاناں
جبرائیل جئے ہین آقا تیرے خدمت گار نبیاں دے سردار
الله الله شهر مدینہ دیکھ کے ٹھر جاندا اے سینہ
مڑ کے جی نئیں لگدا جیہڑا رہ آوے دن چار نبیاں دے سردار
فیصلہ ایہو عشق دی اکھ دا تیری گلی دا ککھ وی لکھ دا
گلاں کر کر جی نہیں تھکدا سوہنے نبی مختار نبیاں دے سردار
کجھ نہیں منگدا ہور نیازی جے ہو جاویں سوہناں راضی
مل پے جاوے اللہ جانے میرا وچ سنسار نبیاں دے سردار
شاعر کا نام :- عبدالستار نیازی
کتاب کا نام :- کلیات نیازی