کیہڑا ہور تیرے وانگوں آقا لج پال دا
میں لج پال دیکھیا نئیں کوئی تیرے نال دا
تیرے بعد دنیا تے نبی کوئی اوناں نئیں
تیرے نالوں سوہنا کوئی رب نے بناوناں نہیں
ہر پاسے چرچا تیرے حسن و جمال دا
رب دے حبیبا تیریاں عظمتاں نرالیاں
جنہاں من لیا ہویاں اوہو کرماں والیاں
جیہڑا تیرے دیوے بالے رب اوہدے بالدا
سینے وچہ اوہدے تیرے عشق دی تجلی سی
ماراں کھائی جاندا سی پر کہندا اللہ اللہ سی
کناں عشق سچا سچا تیرے سی بلال دا
کہندے جبریل وی سی کالی کملی والیا
فرش کی میں عرش دا وی کوناں کوناں بھالیا
اک وی نئیں ڈٹھا اجے تیری میں مثال دا
چھیتی چھیتی آون آقا گھڑیاں اوہ نرالیاں
جیوندے جیوندے چم لئے روضے دیاں جالیاں
اللہ کرے بن جائے بہانہ ایسے سال دا
عاشقاں سجائیاں تیرے نام دیاں محفلاں
درود دیاں محفلاں سلام دیاں محفلاں
ذکر تیرا ساریاں مصیتاں نوں ٹال دا
شان نرالی تیری ذات تیری عالی اے
بھر دے توں جھولی آج جہدی جہدی خالی اے
منگدا نیازی تیتھوں صدقہ تیری آل دا
شاعر کا نام :- عبدالستار نیازی
کتاب کا نام :- کلیات نیازی