کسی شب خواب میں ایسا شہِ ابرار ہو جاتا

کسی شب خواب میں ایسا شہِ ابرار ہو جاتا

مقدر جاگ جاتا آپ کا دیدار ہو جاتا

---

کہاں ایسی مِری قسمت کہاں ایسا مقدر ہے

کہ میں بھی شربتِ دیدار سے سرشار ہو جاتا

---

اگر وہ دیکھ لیتا اک نظر طیبہ کی گلیوں کو

تو گرویدہ یقیناََ مصر کا بازار ہو جاتا

---

مجھے بھی تاجداری مل گئی ہوتی مِرے آقا

مِرے سر جو تمہارا ذرۂِ پیزار ہوجاتا

---

دیارِ مصطفےٰ کی حاضری سے کارآمد ہے

وگرنہ زندگی کا یہ سفر بے کار ہوجاتا

---

عجب کیاتھاکہ طوفاں خود تمہیں لیتا حفاظت میں

نبی کا نام لے لیتے تو بیڑا پار ہوجاتا

---

چلا آیا ہے شاہِ دیں کے پیچھے پیچھے جنت میں

بھلا کیسے غلامِ مصطفےٰ فی النار ہو جاتا

---

تمنا ہے یہی دل میں شہنشاہِ مدینہ بس

شفیقِؔ بے نوا پھر حاضرِ دربار ہوجاتا