مدّت سے ہوں دریوزہ گرِ کوئے مدینہ
کشکول میں رکھتا ہوں زرِ کوئے مدینہ
فردوسِ تخیّل میں سمن زار کی صُورت
آئینہ ہیں دیوار و درِ کوئے مدینہ
ہشیار کہ یہ بارگہِ مصطفوی ہے
اے دل، اے مرے ہم سفرِ کوئے مدینہ
حاضر ہوں لیے کاسۂ جاں دستِ طلب میں
اے ذرۂ خورشید گرِ کوئے مدینہ
اے کارگہِ حسنِ تخیل ہو تری خیر
رکھتی ہے مجھے دربدرِ کوئے مدینہ
آہستہ قدم زن کہ بہ ہر ذرّہ دلی ہست
ای زائرِ آشفتہ سرِ کوئے مدینہ
جاں ناقۂ مستانہ، دلِ گرم، حُدی خواں
اس رنگ میں طے ہو سفرِ کوئے مدینہ
شاعر کا نام :- سیّد شاکر القادری چِشتی نِظامی
کتاب کا نام :- چراغ