نوازے گئے ہم کچھ ایسی ادا سے

نوازے گئے ہم کچھ ایسی ادا سے

غنی بن کے اُٹھے درِ مُصطفےٰ سے

---

طلب سے سِوا بھیک دیتے ہیں آقا

بہت پیار ہے اُن کو ہر بے نوا سے

---

غمِ مصطفےٰ حَاصِل زندگی ہے

مِری زندگی ہے غمِ مصطفےٰ سے

---

تمہارے کرم پر ہیں جن کی نگاہیں

ہیں واقف کرم کی ہر اک انتہا سے

---

اُسے کیا ستائے گا خورشید محشر

ہے نِسبت جِسے دامنِ مُصطفےٰ سے

---

خدا تو نہیں ہیں یہ ہم مانتے ہیں

جُدا بھی نہیں مانتے ہیں خدا سے

---

بشیرٌ نذیرٌ سِراجٌ منیرًا

منّور ہے ہر شے انہیں کی ضیاءسے

---

بھریں گے شہِ انبیاء میری جھولی

کرم سے سخا سے نِگاہِ عطا سے

---

ہوا بے نیازِ دو عالم یہ خاؔلِد

تمہارے کرم سے تمہاری عَطا سے