نازشِ انس و جاں شاہِ والا حشم اے شفیع الامم اے شفیع الامم
آپ کونین میں سب سے ہیں محترم، اے شفیع الامم اے شفیع الامم
آپ کی ذات ہے سرورِ سروراں آپ ہیں یا نبیؐ رحمتِ بے کراں
آپ کے زیرِ پا تاجِ جاہ و حشم، اے شفیع الامم، اے شفیع الامم
غم زدوں کے لبوں پر ہنسی آگئی، ہر رخِ بے کساں پر خوشی چھا گئی
آپ آئے، ہوئے دور رنج و الم، اے شفیع الامم، اے شفیع الامم
نعرۂ حق کی گونجی صدا چار سو، مہرِ وحدت کی پھیلی ضیا چار سو
سرنگوں ہو گئے سب بتانِ حرم، اے شفیع الامم، اے شفیع الامم
لہلہانے لگی خشک بنجر زمیں، باغِ طیبہ ہوا رشکِ خلدِ بریں
پڑ گئے آپ کے جب مقدس قدم، اے شفیع الامم ، اے شفیع الامم
امنِ عالم کے پیغامبر آگئے، چہرۂ اہلِ تخریب مرجھا گئے
خاک میں مل گئے سب غرورِ ستم اے شفیع الامم ، اے شفیع الامم
صبحِ نو آئی ہر سو اُجالا ہوا، دینِ اسلام کا بول بالا ہوا
پل میں باطل خداؤں کے ٹوٹے بھرم اے شفیع الامم اے شفیع الامم
فکر و فن کو مرے تازگی مل گئی ذہن و احساس کو طرفگی مل گئی
جب سے مصروفِ مدحت ہے میرا قلم، اے شفیع الامم، اے شفیع الامم
لاج احسؔن کی آقاؐ بچا لیجیے، اس کو بخشش کا مژدہ سنا دیجیے
ہیں زیادہ گنہ نیکیاں جب کہ کم، اے شفیع الامم ، اے شفیع الامم
شاعر کا نام :- احسن اعظمی
کتاب کا نام :- بہارِ عقیدت