رَاہ گُم کردہ مسافر کا نگہبان تُو ہے

رَاہ گُم کردہ مسافر کا نگہبان تُو ہے

اُفقِ باں پہ مثالِ مہِ تاباں تُو ہے

---

تُو جو میرا ہے تو میں بے سروساماں ہی بھلا

لِلِّٰہ الحمد ‘ کہ میرا سروساماں تُو ہے

---

مجھ کو کیا علم کہ کس طرح بدلتی ہیں رُتیں

جب مرے دشتِ خزاں پر بھی گُل اَفشاں تُو ہے

---

اُس خدا سے مجھے کیسے ہو مجالِ اِنکار

جس کے شہ پارہء تخلیق کا عنواں تُو ہے

---

اَپنے ہر عزم کی تکمیل پہ ایماں ہے مرا

پَسِ ہر عزم اگر سلسلہ جنباں تُو ہے

---

تیرے دم سے ہمیں عرفانِ خداوند ملا

نوعِ انساں پہ خدا وند کا اِحساں تُو ہے

---

یہ بتانے کو ‘ کہ با وزن ہے انسان کی ذات

دستِ یزداں نے جو بخشی ہے ‘ وہ میزاں تُو ہے

---

خاک میں آج بھی ہے گونج ‘ ترے قدموں کی

اَور اَفلاک کی وسعت میں خَراماں تُو ہے

---

تُو نے فاقہ بھی کِیا ‘ اَپنا گریباں بھی سِیا

اور پھر ذَاتِ الٰہی کا بھی مہماں تُو ہے

---

تیرا کردار ہے اَحکامِ خدا کی تائید

چلتا پھرتا ‘ نظر آتا ہوا قرآں تُو ہے

---

رنگ کی قید ‘ نہ قدغن کوئی نسلوں کی یہاں

جس کے دَر سب پہ کھلے ہیں وہ دَبستاں تُو ہے

---

میرے نقاد کو شاید ابھی معلوم نہیں

میرا اِیماں ہے مکمل ‘ مرا اِیماں تُو ہے