رہتا ہوں خیالوں میں ہر آن مدینے میں

رہتا ہوں خیالوں میں ہر آن مدینے میں

ہے جسم یہاں میرا پر جان مدینے میں

---

لے سانس بھی آہستہ انسان ! مدینے میں

رہتے ہیں رسولوں کے سُلطان مدینے میں

---

جی بھر کے میں دیکھوں گا سرکارْ کے روضے کو

لے جائے اگر مُجھ کو رحمٰن مدینے میں

---

عُشّاق جہاں بھر سے آتے ہیں سلامی کو

بنتے ہیں فرشتے بھی مہمان مدینے میں

---

اے کاش ! کہ ہو ایسا ، طیبہ میں رہوں جا کر

اک نعت کا لکھ پاؤں دیوان مدینے میں

---

لا ریب ہے مکّہ میں اللہ کا گھر لیکن

اللہ کا ملتا ہے عرفان مدینے میں

---

کیا حُسنِ سماعت ہے ! کانوں میں سدا جن کے

رس گھولتی رہتی ہے آذان مدینے میں

---

ہے جائے ادب ایسی ، آتے ہیں مواجہ پر

روکے ہوئے سانسوں کو خاصان مدینے میں

---

آواز رہے دھیمی، یہ شہرِ مدینہ ہے

ورنہ تو بہت ہوگا نقصان مدینے میں

---

اے کاش ! جلیل اپنا مسکن بھی مدینہ ہو

آئے گا سمٹ کر جب ایمان مدینے میں