روشنی روشنی ’’صراطِ نُور‘‘

روشنی روشنی ’’صراطِ نُور‘‘

ہر روش بن گئی ’’صراطِ نُور‘‘

---

نعتِ سرکارؐ کے توسط سے

مجھ کو حاصل ہوئی ’’صراطِ نُور‘‘

---

اُنؐ کی مدحت میں جب زباں کھولی

راحتِ جاں بنی ’’صراطِ نُور‘‘

---

اُنؐ کی سیرت نے رہنمائی کی

نقش دل پر ہوئی ’’صراطِ نُور‘‘

---

خاکِ طیبہ ،حضورؐ کے صدقے

بن گئی دائمی ’’صراطِ نُور‘‘

---

شہرِ طیبہ پہ جب قدم رکھا

ذہن میں جل اُٹھی ’’صراطِ نُور‘‘

---

کاش ہو جائے نورِ احمدؐ سے

حرفِ اشفاقؔ بھی ’’صراطِ نُور‘‘