شہِؐ خوبانِ عالم کی محبت ساتھ رہتی ہے

شہِؐ خوبانِ عالم کی محبت ساتھ رہتی ہے

وسیلے سے نبیؐ کے حق کی رحمت ساتھ رہتی ہے

---

مجھے فقر و غنا کی بھیک ملتی ہے پیمبرؐ سے

عطائے شہؐ سے خودداری کی دولت ساتھ رہتی ہے

---

وہ ضبط و تزکیہ کی منزلیں طے کر کے ہیں آئے

محبانِ پیمبرؐ کے نیابت ساتھ رہتی ہے

---

سدا نورانیت رہتی ہے اہلِ دل کے چہروں پر

محبت کرنے والوں کے متانت ساتھ رہتی ہے

---

ثنا کاری میں کارآمد ستارے کہکشائیں ہیں

کنایوں استعاروں کی رعایت ساتھ رہتی ہے

---

خدا سے مانگ لیتا ہوں نبیؐ کا واسطہ دے کر

رسائی کو دعائوں کی یہ نعمت ساتھ رہتی ہے

---

صنائع اور بدائع سے مرصع کیوں نہ ہوں نعتیں

ہمہ دم سرورِؐ عالم کی نسبت ساتھ رہتی ہے

---

بنا ہے رو کشِ نافہ ہمارا پیکرِ ہستی

’’عجب خوشبو درودوں کی بدولت ساتھ رہتی ہے‘‘

---

مجھے کیوں برزخ و محشر کا ہو کچھ خوف اے طاہرؔ

شفیعِ حشر کی ہر دم شفاعت ساتھ رہتی ہے