تڑپ دل میں نہ آنکھوں میں نمی ہے

تڑپ دل میں نہ آنکھوں میں نمی ہے

ابھی کامل کہاں عشقِ نبی ہے

---

سراپا نور ہے جو روشنی ہے

اگر ہے کوئی تو ذاتِ نبی ہے

---

مدینے کی زیارت خوب کی ہے

مگر آنکھوں میں اب بھی تشنگی ہے

---

درودِ پاک پڑھ کر دم کیا کر

مرض تیرا اگرچہ دائمی ہے

---

تبھی خورشید چمکا آسماں کا

شعاعِ ماہِ طیبہ جب پڑی ہے

---

مدد کے واسطے تشریف لائیں

شہِ بطحا ! مصیبت کی گھڑی ہے

---

نہیں ہے کوئی آقا کے سوا، اب

قیامت تک اُنہی کی پیروی ہے

---

شہا ! آکر اسے آباد کر دیں

بہت ویران دل کی جھوپڑی ہے

---

شفیقؔ آقا کی مدحت میں مزے سے

ہماری زندگی اب کٹ رہی ہے