چہرہ ہے کہ بے داغ جواں صبحِ فروزاں
خود بن گئی حیرت کا جہاں صبحِ فروزاں
فیضان رساں ہیں تری آنکھیں، ترے عارض
اور تشنہ لباں آبِ رواں، صبحِ فروزاں
یہ فیصلہِ غوطہ زنِ بحرِ ادب ہے
سرکار کہاں اور کہاں صبحِ فروزاں
یہ اُن کے تبسم کی فقط ایک جھلک ہے
کہتے ہیں جسے آپ مِیاں ! صبحِ فروزاں
شبنم سے وضو کر کے سرِ عالمِ امکاں
کرتی ترا حُسن بیاں صبحِ فروزاں
خیراتِ رخِ سیدِ عالم کے سبب ہے
پیغام برِ امن و اماں، صبحِ فروزاں
جن کو بھی شبِ تار سے شکوہ ہے تبسم
ہے آپ کے ہاں اُن کی زباں صبحِ فروزاں
شاعر کا نام :- حافظ محمد ابوبکر تبسمؔ
کتاب کا نام :- حسن الکلام فی مدح خیر الانامؐ