اُسی کو بنایا گیا سب سے پہلے

اُسی کو بنایا گیا سب سے پہلے

اُسی کو سجایا گیا سب سے پہلے

---

مراتب کی تقسیم ہونے لگی تو

اُسی کو بلایا گیا سب سے پہلے

---

ہوا جب بھی تازہ کوئی حکم جاری

اُسی کو سنایا گیا سب سے پہلے

---

ارادہ کیا جب بھی صورت گری کا

اُسی کوبنایا گیا سب سے پہلے

---

یہ ختمِ نبوت ہے تخصیص اُس کی

اُسی کو بتایا گیا سب سے پہلے

---

صغیرہ کبیرہ سبھی لغزشوں سے

اُسی کو بچایا گیا سب سے پہلے

---

بنایا گیا جب یہ عرشِ معلیٰ

اُسی کو دکھایا گیا سب سے پہلے

---

لگی جونہی اعزاز کی پہلی مسند

اُسی کو بٹھایا گیا سب سے پہلے

---

چھلکنے لگا جب محبت کا ساغر

اُسی کو پلایا گیا سب سے پہلے

---

فرشتوں نے جب گایا اُس کا قصیدہ

اُسی کو سنایا گیا سب سے پہلے

---

اُسی کو ہی بخشے گئے سب تفاخر

اُسی کو بتایا گیا سب سے پہلے