یارب یہ تمنّا ہے کہ نازل ہو وہ ہم پر

یارب یہ تمنّا ہے کہ نازل ہو وہ ہم پر

جو نعت ابھی قرض ہے قرطاس و قلم پر

---

وہ نام مرے وردِ زباں تھا کہ نظر آئے

انوارِ مدینہ بھی در و بامِ حرم پر

---

وہ نُورِ جبیں‘ سارے زمانوں کا اُجالا

وہ نقشِ قدم‘ سایہ فگن ہست وعدم پر

---

طے ہوتی گئی منزلِ اسریٰ کی مسافت

کھُلتے گئے اسرارِ سفر شاہِؐ اُمَم پر

---

جو کچھ بھی مِلا بخش دیا خلقِ خدا کو

حیراں ہے سخاوت بھی اِس اندازِ کرم پر

---

کیا شان ہے اے صلِّ علیٰ ابرِ کرم کی

اُٹھتا ہے عرب سے تو برستا ہے عجم پر

---

توفیق ہے دشوار شریعت نہیں دشوار

قدموں کے نشاں ملتے ہیں ایک ایک قدم پر

---

آقاؐ مری غفلت کو کرم کی ہے ضرورت

اعمال تو ایسے نہیں تکیہ ہے کرم پر