دل مائلِ آرائشِ دنیا نہیں ہوتا

دل مائلِ آرائشِ دنیا نہیں ہوتا

آنکھوں سے نہاں گنبدِ خضرٰی نہیں ہوتا

---

ہوتی ہیں مرے ساتھ ترے شہر کی یادیں

تاریکئِ شب میں بھی اکیلا نہیں ہوتا

---

یہ وعظ و نصیحت ہو مبارک تجھے واعظ !

ہم سے تو وہاں جالی کو پیچھا نہیں ہوتا

---

بوسہ نہ کبھی لیتے فرشتے مرے سر کا

نعلین کے نقشے پہ جو رکھا نہیں ہوتا

---

اُس وقت نہ لے جانا مری روح کو یا رب

جس وقت نگاہوں میں مدینہ نہیں ہوتا

---

سرکار کی بستی ہی وہ بستی ہے جہاں سے

ہوتا ہے عطا وہ بھی جو سوچا نہیں ہوتا

---

جیسا بھی خطاکار ہو پاجائے تسلّی

ہر خطہِ ارضی تو مدینہ نہیں ہوتا

---

ہو اتنا بلندی پہ کہ سدرہ کا مکیں ہو

پھر بھی ترے قدموں سے تو اونچا نہیں ہوتا

---

دل اُن کے تبسم کو دعا دیتا ہے ورنہ

پہلوئے تبسم میں دھڑکتا نہیں ہوتا