حق سرورِ عالم کا ادا کوئی نہ ہو گا

حق سرورِ عالم کا ادا کوئی نہ ہو گا

یہ بھی تو حقیقت ہے خدا کوئی نہ ہوگا

---

جب تک نہ ہلیں گے لبِ سرکارِ مدینہ

واللّٰہ جہنم سے رِہا کوئی نہ ہو گا

---

ہے شافعِ محشر کی نگاہوں کا سہارا

ورنہ تو مرے حق میں کھڑا کوئی نہ ہو گا

---

کہتی ہے محمدﷺ کے ثناءخواں کی طبیعت

سرکار کی مدحت سا نشہ کوئی نہ ہو گا

---

اُس وقت سنانا مرے آقا کو مرا حال

جب پاس ترے بادِ صبا کوئی نہ ہو گا

---

محشر میں سوا آپ کے اے شافعِ محشر

پھیلائے ہوئے اپنی ردا کوئی نہ ہو گا

---

سرکار کی رحمت نے وہیں تھام لیا تھا

جب لگنے لگا مجھ کو مرا کوئی نہ ہو گا

---

ہے تجھ سے محبت کا یہ انعام انوکھا

سب تجھ پہ لُٹا کر بھی لُٹا کوئی نہ ہو گا

---

ہے اتنی کشش ارضِ مدینہ میں تبسم

خوش ہو کے مدینے سے گیا کوئی نہ ہو گا