حد غزل کی جسموں تک ہے

حد غزل کی جسموں تک ہے

نعت کی نکہت روحوں تک ہے

---

کون ہے ایسا جس کی رسائی

عرش کے نوری جلووں تک ہے

---

حد بلندی کی دنیا میں

پاک نبیؐ کے قدموں تک ہے

---

لطف شماری ان کی ہو کیسے

حد گنتی کی کھربوں تک ہے

---

ہم ہیں مودت رکھنے والے

حبِّ نبیؐ ایمانوں تک ہے

---

نئی ہے ہر اک مدحت لیکن

اس کی روایت صدیوں تک ہے

---

خوشحالی ہے ان کی بدولت

لطف نبیؐ کا نسلوں تک ہے

---

ہالہ ان کے لطف و کرم کا

دنیا کے سب گوشوں تک ہے

---

لطف و کرم سرکارؐ کا طاہرؔ

اونٹوں ، ہرنوں ، چڑیوں تک ہے