ہر شعر مرا مدحتِ طاہر کی طرح ہے

ہر شعر مرا مدحتِ طاہر کی طرح ہے

یوں کہیے کہ شہ پارۂ شاعر کی طرح ہے

---

آنکھوں میں رواں قافلہ طیبہ کا ہے رہتا

دل شہرِ مدینہ کے مسافر کی طرح ہے

---

آتا ہے تو مٹ جاتی ہے سورج کی تمازت

بادل بھی ترے شہر کے زائر کی طرح ہے

---

بے داغ سراپا ہے غلامِ شہِؐ دیں کا

دل پاک کسی نور کے ظاہر کی طرح ہے

---

رکھتا ہے عجب کیفِ ثنا اس کا ترنّم

ہر لفظ ہی اُس شہر کے طائر کی طرح ہے

---

میں خوش ہوں بہت اس پہ کہ ہر نعت کا مصرع

روضے کے تنک تاب مناظر کی طرح ہے

---

تکتا ہوں میں خوابوں میں ، خیالوں میں وہی شہر

ہر سانس مرا اس کے مصوّر کی طرح ہے

---

افلاک کی جانب ہے رواں میرا تخیّل

ہر طائرِ فن خلد کے سائر کی طرح ہے

---

تُو ، تم ہو کہ وہ چلتی ضمیریں ہیں ولیکن

آقاؐ کے لیے’’آپ‘‘ ضمائر کی طرح ہے