ہوتی ہیں تواں روحیں اظہارِ محبّت سے

ہوتی ہیں تواں روحیں اظہارِ محبّت سے

عُشّاق پنپتے ہیں سرکار کی اُلفت سے

---

سرکار جو ہوں راضی ، ہوتا ہے خُدا راضی

ہوتا ہے کرم اُس کا سرکار کی رحمت سے

---

سرکار نے فرمایا ’’کُنبہ ہے یہ باری کا‘‘

کیجے گا خُدا راضی ، مخلوق کی خدمت سے

---

چاہو کہ رہیں راضی تُم سے بھی نبی سرور

کرنی ہے مودّت پھر سرکارکی عترت سے

---

سُنّت پہ چلو اُن کی،کُھل جائے گا یہ عُقدہ

تسخیر کسی دل کی ہوتی نہیں نفرت سے

---

سرکار نے طائف کے لوگوں کو دُعائیں دیں

سرکار نے دل جیتے ،لوگوں کے محبّت سے

---

مُختار ہیں جنّت کے ، محبوبِ خُدا لوگو !

جو خُلد میں جائے گا ، جائے گا اجازت سے

---

طیبہ سے جدائی کے ، وہ درد بھرے لمحے

عاشق پہ قیامت ہیں ، پہلے ہی قیامت سے

---

نادم ہے جلیل اِتنا ، اپنے ہی گُناہوں پر

سر ہے کہ نہیں اُٹھتا سرکار ندامت سے