مدحت سدا حضور کی لکھتا رہوں گا میں

مدحت سدا حضور کی لکھتا رہوں گا میں

یُوں عُمر بھر یہ نوکری کرتا رہوں گا میں

---

یہ چاکری حضور کی جاری رہی اگر

پُختہ یقین ہے کہ سنورتا رہوں گا میں

---

گرد و غُبارِ وقت کے ہونے کے باوجود

لکھتا رہوں گا نعت ، نکھرتا رہوں گا میں

---

صلِّ علٰی کا ذکر ہے توشہ ، سو اِس لئے

دامن کو ذکرِ خیر سے بھرتا رہوں گا میں

---

ہر دُشمنِ رسول سے اپنے قلم کے ساتھ

ہر بار ہر محاذ پہ لڑتا رہوں گا میں

---

سرپر مرے کریم کا دستِ کرم جو ہے

میداں میں جان و دل سے اُترتا رہوں گا میں

---

پہنچا نہ پائے گا مُجھے شیطان بھی گزند

سُنّت پہ جب تلک یوں ہی چلتا رہوں گا میں

---

میں جالیوں کے سامنے جاؤں گا جس گھڑی

اشکوں سے تر نگاہ سے تکتا رہوں گا میں

---

چلتی رہے گی سانس مری جب تلک جلیل

بس مدحتِ حضور ہی کرتا رہوں گا میں