مُقدّر کے دھنی ہیں وہ ، مدینے میں جو مرتے ہیں

مُقدّر کے دھنی ہیں وہ ، مدینے میں جو مرتے ہیں

نصیبے بد نصیبوں کے وہیں جا کر سنورتے ہیں

---

غُلامِ مُصطفٰےبھی ہوں،حُسینی بھی دل و جاں سے

تو بُو جہلوں ، یزیدوں سے، کہاں عُشّاق ڈرتے ہیں

---

مُحمّد کے غُلاموں کی تو رہ میں ہوں اگر دریا

جلا کر کشتیاں اپنی ، وہ دریا میں اُترتے ہیں

---

مُحمّد کے غُلاموں کو ڈبو سکتا نہیں کوئی

وہ پاتالوں میں جاکر بھی وہاں سے پھر اُبھرتے ہیں

---

جو اُن کے در پہ جا پہنچے ،وہی تو خوش مُقدّر ہیں

کہ ایماں ، اہلِ ایماں کے وہیں جا کر نکھرتے ہیں

---

جہاں کے بادشاہوں کو بھی اُن پر رشک آتا ہے

کہ جن کے روز و شب آقا ! ترے در پر گُزرتے ہیں

---

قضا آنی تو ہے لیکن ہمیں جب بھی قضا آئے

مدینے شہر میں ہوں بس ، تمنّا یہ ہی کرتے ہیں

---

جلیل اُن کا کرم سایہ فگن جن کے سروں پر ہو

تو بے خوف و خطر غم کے وہ صحرا سے گُزرتے ہیں