تم چاہے جہاں سے بھی ہو آیات اُٹھا لو

تم چاہے جہاں سے بھی ہو آیات اُٹھا لو

ہے مدحتِ سرکار میں قرآن مکمل

---

سرکار پہ ہو جائے فدا جان مکمل

تب جا کے کہیں ہوتا ہے ایمان مکمل

---

ہے یہ مِرے سرکار کا فیضان مکمل

رکھتا ہوں ثنا خوانوں میں پہچان مکمل

---

سرکار ہیں لا ثانی نہیں ہے کوئی ثانی

انساں نہیں اُن سا کوئی انسان مکمل

---

جو اپنی طرح کہتے ہیں محبوبِ خدا کو

مفلوج ہیں اُن لوگوں کے اذہان مکمل

---

تم چاہے جہاں سے بھی ہو آیات اُٹھا لو

ہے مدحتِ سرکار میں قرآن مکمل

---

جس دل میں نہیں ہے مِرے آقا کی محبت

ہر وقت رہے گا وہ پریشان مکمل

---

کہنے کی ذرا دیر ہے سرکار اغثنی

مشکل ابھی ہو جائے گی آسان مکمل

---

اللہ مجھے بھی تو دِکھا کعبے کا کعبہ

ہو جائے سفر کا مِرے سامان مکمل

---

ملتا نہ شفیقؔ آپ کو حسان کا صدقہ

پھر ہوتا کہاں نعتوں کا دیوان مکمل