عقیدتوں کے مدینے کا تاجدار دُرود
عبادتوں کے قرینے کا اعتبار درُود
زہے نصیب کہ بزمِ فروغ نعت میں ہوں
برنگِ شعر زباں پر ہے کیف بار دُرود
سجی ہے آج دُرود و سلام کی محفل
ہزار بار سلام اُن پہ صد ہزار دُرود
سلام چہرۂ انور پہ نور بار سلام
دُرود گیسوئے مشکیں پہ مشک بار دُرود
سلام گوشۂ ابرو پہ دلنشین سلام
دُرود عارضِ تاباں پہ تاب دار دُرود
سلام جنبشِ انگشتِ مہ شکن پہ سلام
دُرود دستِ سخا پر ہزار بار دُرود
خرامِ صبحِ مُحمَّد پہ پُر خرام سلام
قیامِ لَیلِ مُحمَّد پہ اُستوار دُرود
عجب ہے خندہء نیمہ لبی کی رعنائی
تبسّمِ ملکوتی پہ لالہ زار دُرود
دمِ تبسمِ قدسی وہ جھانکتے موتی
دُرود سلکِ جواہر پہ آب دار دُرود
اگر نہ آلِ مُحمَّدؐ کا ذکر ہو اس میں
نگاہِ مصطفویؐ میں ہے بے وقار دُرود
سلام تشنہ لبانِ فرات پر ہر دم
شہیدِ کرب و بلا پر ہو اشک بار دُرود
سلام زینبؑ و کلثومؑ کی رداؤں پر
دُرود پردہ نشینوں پہ پردہ دار دُرود
سلام چھوٹے علیؑ کی بڑی شہادت پر
دُرود ننھی سکینہؑ پہ بے قرار دُرود
سلام، راکبِ دوشِ نبی پہ نازاں ہے
سوارِ نیزہ پہ کرتا ہے افتخار دُرود
سلام قافلے والوں کی بے نوائی پر
دُرود عابدِ بیمار پر ہزار دُرود
حسنؑ، حسینؑ، علیؑ اور سیّدہ زھراؑ
نبیؐ کے سارے گھرانے پہ بے شمار دُرود
وفورِ جوشِ مؤدّت سے بھیجیے شاکرؔ
ریاضِ آلِ مُحمَّدؐ پہ پُر بہار دُرود
شاعر کا نام :- سیّد شاکر القادری چِشتی نِظامی
کتاب کا نام :- چراغ