زمیں کے ساتوں طبق ساتوں آسماں مہکے
حضور آپ کے آنے سے کل جہاں مہکے
بدن سے ٹپکے پسینہ تو لہلہائے چمن
اسی پسینے سے یہ مشک و زعفراں مہکے
گلابِ عشق پیمبر کی دیکھیے نکہت
کہ ایک فرد نہیں سارا خانداں مہکے
خلیلی باغ کے گل پر نثار ہو جاؤ
کہ جس کی عنبریں خوشبو سے جسم و جاں مہکے
نبی کے جسمِ معطّر کے لمسِ اطہر سے
زمین مہکے فلک شمس و کہکشاں مہکے
نگار خانۂ ہستی میں ان کے آنے سے
یہ غنچہ، گل یہ چمن اور گلستاں مہکے
نبی کی نعت ہمیشہ تو گنگنا احمدؔ
نبی کی نعت سے ہر دم تری زباں مہکے
شاعر کا نام :- مولانا طفیل احمد مصباحی
کتاب کا نام :- حَرفِ مِدحَت