سخن ہے زمیں آسماں مصطفیٰ ہیں

سخن ہے زمیں آسماں مصطفیٰ ہیں

تخیّل نہ پہونچا جہاں مصطفیٰ ہیں

---

یہ دولت انہی کے کرم کی بدولت

جدھر دیکھتا ہوں وہاں مصطفیٰ ہیں

---

یہ رُتبہ مدینے پہنچ کر ملا ہے

کہ ہم میہماں ، میزباں مصطفیٰ ہیں

---

چراغ محبت جلے تو خبر ہو

جہاں روشنی ہے وہاں مصطفیٰ ہیں

---

جلائے گی دوزخ مجھے کس طرح تو

کہ میرے تیرے درمیاں مصطفیٰ ہیں

---

کرم کی گھٹا اور رحمت کی بارش

یہ دونوں جہاں ہیں وہاں مصطفیٰ ہیں

---

اب اس سے بھلی اور تعریف کیا ہو

سخن ہے خدا کا زباں مصظفیٰ ہیں

---

ادیبؔ ان کی محفل جہاں بھی سجی ہے

یقیں کہہ رہا ہے وہاں مصطفیٰ ہیں