اپنے مستوں کی بھی کچھ تجھکو خبر ہے ساقی

اپنے مستوں کی بھی کچھ تجھکو خبر ہے ساقی

مجلس کیف تری زیر و زبر ہے ساقی

---

اب نہ وہ دن ہیں نہ وہ شام و سحر ہے ساقی

بند میخانہ فیضانِ نظر ہے ساقی

---

بات مت پوچھ غم عشق کے افسانوں کی

خاک چہروں پر اڑا کرتی ہے ویرانوں کی

---

اب تو جنت بھی ہے سرکار کی قربت بھی ہے

ترے مولا کی ترے حال پر رحمت بھی ہے

---

زیب سرتاج شہہ ملک ولایت بھی ہے

ہاتھ میں عالم جاوید کی دولت بھی ہے

---

جب سبھی کچھ ہے تو خیرات لٹادے ساقی

چشم مخمور سے پھر جام پلا دے ساقی

---

ترے دربار میں پھر شور ہے میخواروں کا

حوصلہ تشنہ نہ رہ جائے وفاداروں کا

---

آ کے اب حال ذرا دیکھ لے بیماروں کا

واسطہ دیتے ہیں ساقی ترے سرکاروں کا

---

بہر تسکین یہ تکلیف گوارا ہو جائے

آج تربت سے نکل آ کہ نظارا ہو جائے

---

اک نظر ڈال کے دنیا تہہ وبالا کر دے

بزم دل نور تجلی سے اجالا کر دے