باعمل میرِ کاروان بھی دے

باعمل میرِ کاروان بھی دے

تو جو چاہے تو دوجہان بھی دے

---

قومِ موسیٰؑ کو تونے سلویٰ دیا

برکتوں والا ہم کو خوان بھی دے

---

فاصلے ختم ہوں حرم سے مرے

مجھ کو شاہین سی اُڑان بھی دے

---

غمزدہ بستیوں کو اے مولا

رحمتوں والا آسمان بھی دے

---

مالکِ کل یہی دعا ہے مری

ہو فدا دیں پہ ایسی جان بھی دے

---

شان جو دین کی تھی ماضی میں

پھر وہی اس کو آن بان بھی دے

---

سُرخ رو ہو تمام عالم میں

پاک دھرتی کو ایسی شان بھی دے

---

جھوٹ، غیبت سے جن کو نفرت ہو

وہ زباں اور ایسے کان بھی دے

---

شہرِ رحمت میں اے مرے مولا

اپنے طاہرؔ کو اِک مکان بھی دے