عجز کو عرش تک رسائی دوں
اور تجھ کو تری دُہائی دوں
تیرے اوصاف حرزِ جاں کر کے
نفس کو درسِ پارسائی دوں
قلب کو ذکر سے کروں روشن
فکر کو شِرک سے رہائی دوں
تو مری ذات کو صفات بنا
میں انہیں تابِ خود نمائی دوں
تو مجھے صرف اپنی چاہت دے
میں ترے نام پر خدائی دوں
ہر بُنِ مُو سے نام لوں تیرا
فرش سے عرش تک سنائی دوں
تو ہے لیکن کسے مجالِ نظر؟
میں نہیں ہوں تو کیا دکھائی دوں؟
شاعر کا نام :- حنیف اسعدی
کتاب کا نام :- ذکرِ خیر الانام