ہو چشم عنایت شہِ جیلاں مرے لئے
ہو چاره ساز رحمت یزداں مرے لئے
آواز دی ہے جب سے انہیں کہکے دستگیر
شام الم ہے صبح بہاراں مرے لئے
میں ہوں دیارِ غوث میں پھر آج شب گزار
رک جائے کہد و گردشِ دوراں مرے لئے
مرہم ہو یا کہ نشتر غم سب ہے خوشگوار
جب تم ہی خود ہو درد کا درماں مرے لئے
داغ دلِ غریب ہے ہم رنگِ لالہ زار
ہے شام آرزو کا چراغاں مرے لئے
شام نشاط و صبح طرب بہر دیگراں
صد مرحبا کہ ہے غم جاناں مرے لئے
اے کاش پوچھیں حشر میں جیلاں کے تاجدار
ارشد کہاں ہے اشک بداماں مرے لئے
شاعر کا نام :- علامہ ارشد القادری
کتاب کا نام :- اظہار عقیدت