دل تمہاری دید کا جس دن سے خواہاں ہو گیا

دل تمہاری دید کا جس دن سے خواہاں ہو گیا

سارا گلشن میری نظروں میں بیاباں ہو گیا

---

پڑ گئی جس پر شعاعِ روئے تابانِ رسول

ذرّۂِ ناچیز بھی مہرِ درخشاں ہو گیا

---

وہ سراپائے کرم ہیں میں ہوں محتاجِ کرم

یہ تعلق راحتِ دل، راحتِ جاں ہو گیا

---

مٹ گیا کفر و ضلالت کا اندھیرا دہر سے

مہر جب رشد و ہدایت کا درخشاں ہوگیا

---

بےخودی میں اُن کاجلوہ روبرو تھا خوب تھا

’’ہوش میں آنا حجابِ روئے جاناں ہوگیا ‘‘

---

جھلکیاں نورِ خدا کی تھیں نظر کے سامنے

جس نے دیکھا آپ کا جلوہ وہ حیراں ہوگیا

---

گِھر کے طوفاں میں پکارا جب اغثنی یا نبی

میری کشتی کا نگہباں خود ہی طوفاں ہوگیا

---

جب شبیہِ احمدِ مختار دِکھلائی گئی

نور برسا قبر میں ہر سو چراغاں ہو گیا

---

کام تھا دشوار میرے حق میں روضے کا طواف

یہ تو بس فیضِ تصور تھا کہ آساں ہو گیا

---

میرے ہونٹوں پر درودوں کا وظیفہ تھا شفیقؔ

غم پریشاں کرنے آیا خود پریشاں ہوگیا