شوقِ دیدارِ مواجہ ہے سدا سے مجھ کو
چین ملتا ہے مدینے کی دعا سے مجھ کو
کشتِ مژگان میں مہکیں گے گلِ دیدِ نبی
ہجر سرکار کا دیتا ہے دلاسے مجھ کو
سر بہ خم یونہی نہیں ہوں میں حرا کی جانب
مشک سرکار کی آتی ہے حرا سے مجھ کو
مجرمِ جرمِ خطا ہو کے بھی امید یہ ہے
آپ کی نعت بچا لے گی سزا سے مجھ کو
کون مقصودِ حقیقی ہے یہ معلوم نہ تھا
شاہِ خوباں نے ملایا ہے خدا سے مجھ کو
مفلسِ حرف ہوں اے حاصلِ کن، بہرِ ثنا
لفظ مقبول عطا کیجے ذرا سے مجھ کو
آلِ اطہار کی الفت ہے مرے سینے میں
جان سے پیارے ہیں آقا کے نواسے مجھ کو
جاؤ اشفاق تمہیں طیبہ بلاتے ہیں حضور
کاش پیغام یہ مل جائے ہوا سے مجھ کو
شاعر کا نام :- اشفاق احمد غوری
کتاب کا نام :- انگبین ِ ثنا