اس کے فکر و فن کو بخشے گا خدا اوجِ کمال
نعت گو جو واقعی ہے خوش عقیدہ خوش خصال
نورِ عشقِ مصطفیٰؐ سے فکر گر روشن نہیں
پھر تو راہِ مدحتِ سرور پہ چلنا ہے محال
منزلِ عرفانِ حق کی راہ خود مل جائے گی
دل میں پیدا تو کرو عشقِ نبیؐ مثلِ بلال
شافعِ محشر ہیں آقاؐ اپنا یہ ایمان ہے
وہ منافق ہے جسے اس میں ہے شک و احتمال
شانِ آقاؐ میں اہانت کے ہوں جو بھی مرتکب
ایسے گستاخانِ سرور سے عبث ہے قیل و قال
ہوشیار اے مومنو! ایماں کے رہزن چار سو
پھر رہے ہیں مومنوں جیسے بنا کر خد و خال
چاہتا ہے گر پیمبر کی غلامی کا شرف
اسوۂ سرکار میں حسنِ عمل سے خود کو ڈھال
غازۂ حُبِ نبیؐ مل رُخ پہ پھر تاثیر دیکھ
رُک کے دیکھے گا زمانہ روئے انور کا جمال
دل میں جب باقی نہیں خوفِ خدا حُبِ نبیؐ
قومِ مسلم پر بھلا پھر کیوں نہ آئے گا زوال
زندگانی کاش گزرے کوچۂ سرکار میں
اور مجھ احسؔن کا ہوجائے مدینے میں وصال
شاعر کا نام :- احسن اعظمی
کتاب کا نام :- بہارِ عقیدت