وہ واعظ و خطیب وہ اہلِ قلم غلط

وہ واعظ و خطیب وہ اہلِ قلم غلط

سب منکرینِ عظمتِ شاہِ امم غلط

---

فرمایا مصطفیٰؐ نے ہے معبود ایک رب

باقی سبھی خدا ہیں غلط ہر صنم غلط

---

رقصاں ہوئی چمن میں بہارِ نشاطِ عام

صدقے میں مصطفیٰؐ کے ہوئے جگ کے غم غلط

---

اس کے سجود کام نہ آئیں گے جو کہے

ہے حشر میں شفاعت شاہِ امم غلط

---

تو سنتِ نبیؐ سے ہے غافل تو پھر ترا

دعوائے حُبِ صاحبِ جود و کرم غلط

---

تقویٰ نہ کام آئے گا حُبِ نبیؐ بغیر

زاہد ہے نازِ زہد کا تیرا بھرم غلط

---

ہے حکمِ احترامِ مذاہب نبیؐ کا جب

پھر تو ہے بغضِ دیر و کلیسا حرم غلط

---

مثلِ نجوم سب ہیں صحابہ رسولؐ کے

تفریق ان میں ہم جو کریں تو ہیں ہم غلط

---

پھر تو جلوس و جلسۂ سیرت ہیں رائگاں

سنّت کے بر خلاف اٹھا گر قدم غلط

---

ہوگی نہ معتبر تری نعتِ رسولِ پاکؐ

احسؔن جو واقعات کروگے رقم غلط