وہ آستانِ پاک کہا ں ‘ میرا سر کہاں
میں اک بشر کہاں ‘ درِ خیر البشر کہاں
اک سیلِ رنگ و نُور ہے حدِ نگاہ تک
وہ جلوہ گاہِ قدس کہاں‘ یہ نظر کہاں
منشائے شوق اپنی جگہ معتبر سہی
نظارہء جمال کی جراءت مگر کہاں
ان کا خیال ‘ ان کی ثنا ‘ ان کا ذکرِ خیر
وارفتگانِ عشق کو اپنی خبر کہاں
اب ہم ہیں اور مدینے کی گلیوں کے روز و شب
اُس در کے سائلوں کا کوئی اور گھر کہاں
کٹنے کو کٹ رہے ہیں شب و روزِ زندگی
لیکن دیار ِ پاک کے شام و سحر کہاں
اے سرزمینِ وادئ بطحا پناہ دے
چھانیں گے خاک اہلِ وفا در بہ در کہاں
ذکرِ رسولﷺ صرف مداوا ہے درد کا
ورنہ غمِ جہاں سے کسی کو مفر کہاں
شاعر کا نام :- پروفیسراقبال عظیم
کتاب کا نام :- زبُورِ حرم