جس سے مراد مدحتِ شاہِ اُمم نہیں

جس سے مراد مدحتِ شاہِ اُمم نہیں

قرآں میں ایسی ایک بھی آیت رقم نہیں

---

کس ذی وقار کا سرِ تسلیم خم نہیں

میرے نبی کے جیسا کوئی محترم نہیں

---

لے دے کے اک یہی تو ہنر اپنے پاس ہے

نعتِ نبی کی بزم سجے اور ہم نہیں

---

رکھتے ہیں میری لاج چھپاکر مِرے عیوب

مجھ پر مِرے حضور کے احسان کم نہیں

---

آقا کے دم سے ہے یہ ضیا بار کائنات

وہ ہیں تو ہم ہیں وہ جو نہیں ہیں تو ہم نہیں

---

بیشک ہے خوب گلشنِِ جنت بجا مگر

رضواں! مِرے حضور کا روضہ بھی کم نہیں

---

قولِ رضاؔ ہے چلیے یہاں سر کے بل شفیقؔ

قدموں کے واسطے یہ زمینِ حرم نہیں